星期六, 8月 25, 2007

你個朵有幾香?

今天老總失驚無神行過來。「Marshmallow,你認識R君嗎?他在你舊公司做,現正apply某某的空缺」。

小女子的部門有一有趣的文化,在與每一位potential candidate見面以前,老總和經理們,通常會互問意見,看看誰認識那位先生小姐。美其名說是民主的請人手續,不如說是—起底。小女子請人時也不例外,通常都會多口問一問同事,對某君是否認識,而十次,也有一、兩次,又真的有同事會有意見。而且,意見並不是每次都中肯:

「某某是就是盡忠職守,不過正死蠢,踢一踢,動一動…」

「某某是醒目仔,最精玩政治…」

「某某非常獨立—他在公司犯眾憎!」

人在職場,你個朵有多香,直接影響你的前途後路。很多時候,朋友們會為一點短期的利益,又或是一時之氣,做出一些以後很難彌補的行為。打工是一門學問,要保飯碗,首要注意保自己的朵。最忌的除了是偷懶,就是為一時之氣口多、動作多。

其實本港每一個行業都非常細,銀行界的IT人更是少之有少。全港最大的銀行有匯記、中記、花記、法記、麥記、雷記、瑞記、德記、大摩記、小摩記…數數也用不了十隻手指。小女子的部門有100人,已經算是大規模,全公司算有1000人好未?再加上其他小型銀行、Service Provider,合共也不過萬多人。若果老總真的有閒情日誌問足部門的人,難想像會無人認識你,也難想像眾多人中,會無敵人。

記得小女子見工時,過五關、斬七將。七將之中,也有非IT人仕,也難想像七將之中沒有人問過身邊的同事對小女子的認識。假若小女子的朵臭了些少,又遇著個交易員碰巧當天沒有擦牙,說句「個Marshmallow正粉腸!次我叫極佢都唔蒲頭,死懶蟲!」,小女子的CV,再懂得飛也無用。小女子就曾經有一位上司,離開公司多年以後,還有同事拿她的行為作話柄!也曾經遇過一位極無恥的同事,因私利而對小女子耍出下流的手段。小女子當時想,如果他朝有日再碰頭…

公司有某同事A君,怨氣重得令人吃驚。有時候,也明白工作辛苦,想呻一、兩句,無可厚非。但把話說得這樣盡,對自己其實一點好處也沒有。旁人雖不出聲,也不代表他們的眼睛不雪亮。就算他今天因聲勢大、上頭買他怕,也難保日後同事們會就此忘記了他的聲音。

就在這時,小女子在大摩記的朋友打電話來。「Marshmallow,聽聞你們那裡有位A君…」

10 則留言:

安諾勿斯 說...

死火,我個朵臭曬添,你叫我點萛?

匿名 說...

既然 a 君咁重怨念, 有無諗過美言幾句, 送佢上路!?

C.M. 說...

匯記、中記、花記、法記、麥記、雷記、瑞記、德記、大摩記、小摩記...

咦?仲有你果間呢?

惡女 說...

O岩呀!我地都係行頭窄,個朵臭左就死得。

但我亦好睇唔過眼一o的行家,成日懶係同人friend咁,就係為左舖路轉工,好假。

Marshmallow 說...

安諾勿斯—你話自己個朵臭,唔通你係我同事?!

匿名君—哈哈,咁又唔洗。小女子有個便好既辦法,就係發A君既CV俾相識既Agent,希望佢快快搵新工...當然,小女子既「好意」,佢係唔知道既...

CM兄—依?乜小女子漏數自己間公司咩?無喎...嘻嘻!

惡女—同事/行家同樣道理,今日留一線,他朝好相見。不過,有時候拍一下膊頭扮一下老友就梗要既,總好過大家明刀明槍互插...

變幻原是永恒 說...

我果行都係好鬼細, 好彩個名聲都保持到, 否則真係好鬼驚~

K 說...

"今日留一線,他朝好相見。"

又俾我諗起:

"他朝君體也相同"(之前那句不講好了)。

同埋,

凡事不可去得太盡。

Esaltato 說...

原來市場上真係冇咩人會講loyalty。今日係我office幾位同事既last day @@"。
其實都想請教下一個問題。例如有幾位中級同事quit左啦, 咁點解d老細鐘意係出面請人補返個中級位, instead of升自己人再請新人呢? (assume 0個d自己人已經足夠經驗)

Marshmallow 說...

Esaltato—小女子自己都曾經問過這問題,點解上層有空缺,老細唔由下層升上去?原因非常簡單:就是老細唔認為下層有人合適空缺。

這對做細既講真係好難聽,但係現實歸現實,除非老細需要新血加d新意思,升個細既,請番個細既一定平好多。而且以老細既角度睇,有邊個老細會唔想升個細既上去,一等個細既當佢神咁拜,二個細既知係你升佢上去,一定聽教聽話。

野蠻郡主 說...

YUp..其實行行都細..除左成日轉行