星期四, 5月 28, 2009

請鼓掌

兄叫鼓掌, 小女子又玩埋一份.

落雨天的繁忙時間, 巴士逼到人貼人.
小女子前無去路, 後有入口的電門. 巴士離站, 再埋站…
司機大哥: 小姐唔該借借, 開唔到門! (吓? 你仲想上客?!)
嬋: 唔該唔該, 借個位企! (借咗俾你, 我企邊?)
小女子: 等等, 唔好再逼我, 透唔到氣… (挺胸收腹, 讓多兩吋位)
嬋: 唔該唔該, 我要入錢!! (吓?! 前面仲塞住兩個人, 連我都未入到喎!)
小女子: 等啲人行咗先啦 (火到黎埋!!)
嬋: 唔該唔該, 我要入錢呀!! (阿嬋, 你loop死左?)
司機大哥: 大嬸唔該借借, 關唔到門!
小女子: … (一對中年巨乳, 一野壓落小女子個背脊…)
嬋: 唔該啦小姐, 我要入錢呀! (xyz%$#加上斜視怒睥, 你點解咁唔醒水?)

然後一個無摭無掩的加拿大, 就這樣, 擦過小女子和前面位OL的膞頭, 還給小女子見到, 前面的那一位, 穿了件Chanel suit…

請鼓掌 !!!

事發巴士: 港島某成巴路線的晨早特別班次.

星期一, 5月 25, 2009

識飲識食之 –Gaddi’s (半島酒店)

小馬哥生日, 當然又是一個豪飲豪食的好時機. 見大貓白金卡有優惠, 三個course的商務午餐才$420一位, 連餐酒一杯, 便特地請了半天假去試一試, 結果完全意想不到, 食到入院!

訂坐時經理再三叮囑dress code, 既然是商務午餐, business casual當然無問題了, 男仕們規定著有領裇衫, 女仕們則穿不露手臂的上衣便可. 人靠衣裝, 上得高尚的場所, 要專重場合也不為過. 反而奇怪的是見到一班阿叔打扮的客人, T-shirt牛記地高談闊論, 好像不太好.

才坐下, 侍應們便有禮地介紹是日主菜和餐酒. 餐包也有啤酒包, 法包, 提子包, 煙肉和小牛角包四種選擇. 結果我倆點了Chateau Phillippe de Rothchilds的紅酒, 邊嚐紅酒邊試煙肉和小牛角包, 慢慢討論究竟法文的餐牌是什麼東東.

是日菜單有

法式牛肉湯
牛肉湯非常清甜, 上桌時先上湯中的伴菜, 再由兩位侍應同時放下湯水, 感覺到真正法國菜的服務.

西班牙青豆凍湯
可能小女子和小馬哥的法文實在有限, 點菜時又不太清楚, 竟然來了一個凍湯. 總覺得凍湯是嚴夏的佳品, 剛巧那天天氣比較清涼, 實在不懂欣賞.

大蝦意大利飯配海膽汁
意大利飯和多隻大蝦, 配上金黃色的海膽汁, 賣相精緻. 海膽汁味道濃郁, 上菜時打成泡沫, 小小的剛巧夠小女子一個人的份量. 大蝦半生熟, 不知是否和最終要入院有關…

燒肉眼配芝士薯餅
比較平凡的一道菜, 在普通的西餐廳也輕易能叫到. 肉眼要了五成熟,從生的部份也可看見, 最少age了28日以上, 顯然是上等貨.

朱古力慕絲
以鷄尾酒杯捧上, 朱古力分為三層, 上中下層的朱古力有不同的濃味, 吃得小馬哥分了一口給小女子以後, 便一人獨佔了.


訂位前說明了是生日訂坐, 甜點過後, 酒店細心地送上蛋糕一個, 數位侍應們還一同唱生日歌, 算是非常喎心. 當時已再無餘地, 只好打包拿回家. 一心以為給了小馬哥一個完美的生日宴, 怎料好戲在後頭…

首先是小馬哥開始下瀉, 然後是小女子上吐, 當夜還約了一班好友替小馬哥夜場直落, 不過我倆坐不過半小時, 便再也忍不了, 打的到醫院求助去了. 折騰了一整夜, 倒是多了一個難忘的回憶!

星期一, 5月 18, 2009

黑色五月

先是三位朋友一同失業, 急找新工作, 但音訊全無.

然後老細做大手術, 停工一個月, 忙到嘔茄.

再有同事的太太不敵癌症過身, 無限期停工去照顧小女兒, 緊促的人手再死多一錢重.

又聽到朋友和丈夫分居的消息. 去年才在星洲辦世紀婚禮, 還不到一年, 便分道揚鑣. 聽聞, 是因為男方去年在金融海潚之中失去了工作, 接受不了一手創下的對沖基金倒閉的現實, 不斷怨天尤人, 直至身邊人都忍受不了.

急需好消息, 來調劑一下這個黑色五月.

星期二, 5月 05, 2009

戰衣

極度期待那一天的來臨.