星期三, 8月 15, 2007

埋堆

曾經有一段時間,小女子頗執著和同事們埋堆這玩意。由其是在舊公司時,一眾同事們無論有多不合攏,每天總會分兩幫人一同午膳;一個星期也總會有一、兩次歡樂時光。總之大家在背後互片是一回事,飯照吃、酒照喝,再不交心,也得把酒談心,上中下級階層一同玩這虛偽遊戲,你不合便成為別人茶餘飯後的話題。

來到現在這公司,可能同事們比較年輕,比從前較明刀明槍。總之我不喜歡你,有理無理,一定插你,也不用妄想能和他們埋堆。事實上,同事們怨氣怎重,小女子在這公司的年資尚淺,又未到了有怨氣這地步,你說的我未必聽得懂,我說的你又未必喜歡,大家根本談不合攏。不埋堆,大可早點回家休息,儲足精神明天再博殺,比較實際。

不過這對策,不是沒有副作用。

小女子在這部門的身份尷尬。實際上,未請到人填補空缺之前,小女子並無下屬,但除了部門主管,又無人可以點小女子做事。小女子管轄的兵馬,全屬臨時性質,視乎項目而定,兵團有所變動。兵團的人,自有自己的朋友和老細,也有一些不合拍,但因項目而走在一起;有些,又會因和自己隊伍的人多交流,而對小女子的認識有些差;當然也有一些「見人講人話;見鬼講鬼話」的醒目仔,在這經理前說那經理的壞話…總之關係複雜得不得了。

對某些閒話,如說小女子是走狗、無聲狗等(其實狗這動物比起人相當可愛,簡單得來又忠心,明白事理…不明白為何人偏偏以狗作扁義詞!),小女子也略聽過一、二。

小女子處理這些問題時,是以不理會的居多,總之影響不了項目,不是我要管理的priority,也不會失驚無神搭膊頭和他們稱兄道弟,祈求他們的諒解。安慰的是,和小女子共事過的下屬,是比較能中立的居多。小女子不奢望他們會為小女子說好說話;能夠中立,對小女子而言,已經算是興幸。

其實對此頗感慨。一向以來,小女子習慣了體生活,怎至在不多久的從前,會認為不合的同事,大多在心理上對公司的同事有所不滿而作出反應。殊不知,數年以後的小女子,會成為不合的一位。

究竟怎麼才是最佳的對策?埋堆?又或是堅持自我?小女子真的不知道。

9 則留言:

安諾勿斯 說...

我宜家咪埋緊你埋囉。我撐你﹗

匿名 說...

Marshmallow,

其實...有陣時真係要睇唔同既工作類野...打單泡一腳踢既工,例如記者咁就真係唔駛點埋堆...但係去到某一個位置,又要講team work既話,就有需要維持一個班底...具備各種唔同既能人異事,應付唔同既挑戰...所以,點解就連超人同蝙蝠俠再加一大班Super heroes都要走埋一齊組成Justice League...

不過...既然有「正義聯盟」...被遺棄果班「奸角」就會企埋一齊,自然就...「山頭」林立...

匿名 說...

吠吠 吠吠 ......

野蠻郡主 說...

有時真係唔知點好,老生常談既就係自己唔好講人先,唔好咁上心,你仲有其他朋友支持你嘛!

xiao zhu 說...

用我嘅經驗同性格就一定係堅持自我。一啲都唔容易,但係唔係唔得架,唔係一定會變成獨家村架。不過有一樣嘢係好緊要嘅,你一定要有實力、做好自己。

唔好意思,第一次黎就牙斬斬,希望唔好見怪。^^

Marshmallow 說...

安諾勿斯—多謝晒囉,不過你都唔話我知你係呀邊個,係神係鬼,我睇唔出喎...

AK兄—埋堆呢d野,有辣有唔辣,一大班有怨氣人坐埋一齊,除了令怨氣變得更重之外,都未見過有咩好結果。

小狗—乖乖小狗,唔好嘈,俾舊骨頭你食。Sit...

郡主—多謝晒。其實都無咩所謂,職場本身就無朋友。不過係覺得有d悕虛囉。有時覺得,你鐘意我日子係咁過,你唔鐘意我日子又係咁過,又為咩呢?

小豬—歡迎光臨!獨家村都幾寂寞架。有時候係公司,對外反而多人幫下手,同自己條team d人反而一日都講唔多過十句。不過學你咁講,只要做好自己,其他野都唔係咁緊要。

C.M. 說...

隨心而行,率性待人。

朋友嘛,多數心照不宣。他人嘛,若明白,自然好,若不明白,自己最需要關心的還是自己。

安諾勿斯 說...

哈哈﹗我又係神,又係鬼。都話挖到我,請你去Cova high-tea囉。

Esaltato 說...

COVA都係得個名,D CAKE都麻麻地。
不過講時講,有時憎一個人真係可以冇藉口。就算計都冇傾過一句都可以因為你樣衰而憎你。適當時候又要厚住面皮埋人堆,適當時候又要表現出唔係跟尾狗喎,真係好無聊。唔係為左錢,個個都唔駛X熟狗頭同人扮FRIEND啦。所以為左份好工好價錢,都係要繼續HEHEHAHA扮傻埋堆。你估真心話真係可以飲一口"清心棧"就講得咩~~~