星期一, 6月 30, 2008

升職

小女子最近升了職,除了職銜以外,其實改變不太大,最重要的人工也只是僅僅追得上通漲.但是,這並不妨礙同事們的閒言閒語.

“咁都升佢唔升我,真係天冇眼!”同事甲反白眼地道.

“我一日係公司做足十幾個鐘,比佢勤力多多聲啦”同事乙似乎十分氣憤.

“公司女性少嗎!咪唯有升佢囉!如果唔係點同上頭交代男女平等喎!”同事丙懶公平地道.

“話唔定佢同老細…”三位同事竊竊私語,小聲講,大聲笑.

心中不禁嘆了口氣,一整年來的努力,就這樣給這些閒言閒語抺殺了.同事甲作為一個”足不出户”的程式員(並非是小女子小看程式員,事實上,比他對業務有所認識,有所興趣的程式員大有人在),又怎會比小女子更清楚一直以來交易員的怨氣?同事乙如果一天十幾個鐘少點説話,多點做事,又何嘗不會有升職的一天?如果小女子真的和老細有路,又怎會一年以來做得賊死?

自我安慰地想起最近在商務讀到的老子道得經:

知人者智 自知者明
勝人者有力 自勝者強
知足者富 強行者有志
不失其所者久 死而不亡者壽

升職屬工作能力的肯定與否,小女子不大清楚;但非常肯定的是,今年,命犯小人.

13 則留言:

安諾勿斯 說...

恭喜,恭喜!恭喜棉花姐榮陞之喜!祝工作順利,小人消失。

公司係是非地,閑言閑語實有。把口生係人到,人地講乜咪由佢囉。清者自清,最緊要啲高層認同棉花姐o既成績同努力。

不過,棉花姐咁講啲「足不出户」o既程式員好似唔好指意升咁,小心踩親人地(包括小弟)條尾喎。

Marshmallow 說...

安兄,多謝先.

講真,莫講話睇唔起班程式員,其實對小女子黎講,好既程式員,係小女子既勁敵,分分鐘對個市場既認識,比小女子多好多,可以教番小女子轉頭.對個市場認識深既程式員,有眼睇,佢地同交易員既關係分分鐘比小女子精湛,講野做野都有basis.相反,有啲程式員,寫code可能真係好叻,但係對個市場認識一知半解,而且好怕見交易員(小女子所謂既”足不出户”),正正係因為佢地自知自己唔明白個market點運作...同事甲,就係呢種人.

如你所講,清者自清.串啲講句,老細想升我,我想既咩!不過唔開心,就真係有啲.一年多既努力,原來可以咁容易就抺殺咗.

安諾勿斯 說...

唔…小弟有啲意見。

一間公司,人人有唔同o既岡位,唔同o既岡位當然有唔同o既focus。如果個post唔係business facing,咁對market o既認識當然就冇啲business facing o既人咁多。寫code又好,吹水又好,其實都係幫business,幫公司做o野,賺錢。每一個岡位其實都同樣重要,只要係自己o既岡位做得出色、專業,其實都對business contribute唔少。

如果升職只係睇你o既business knowledge,而唔睇technical o既,咁個對啲non-business facing o既同事就太唔公平,抹煞同事o既努力。更何況佢份糧又唔係自己出,小弟真係唔會人阻發達,升一齊升,加人工一齊加,皆大歡喜。

C.M. 說...

恭喜恭喜。

安兄: 若果綿綿升既職係管理性質居多既,咁technical與否就相對次要lu。

K 說...

恭喜晒!

又, 升職同勤力與否係無關的, 升人的第一standard係能力問題, 尤其係做管理。

以下乃係我求其地以HR角度分析:

關於同事乙:上述講了, 不重覆。
關於同事甲: 有能力的話, 只是遲早的事, 無須眼紅。不過講得到“話唔定佢同老細…”的話, 能力好極有限。
關於同事丙: 唔知您呢位同事係咪男同事, 不過咁講的話, 睇得出吃不到葡萄是酸的心情, 而且就算全公司女性係少數的話, 升人不是看性別(當然有些另有目的的僱主就另作別論, 不過我諗您老闆唔多似有目的)。

>>命犯小人
係咪無"攝"太歲呢?不過, 若然係無宗教信仰或者信耶穌和穆罕默德等神的話, 您都不用這樣說。

Samsara 說...

恭喜!不過升職等於責成增加,我有個朋友既夢想就係:唔升職,但人工照加...

Marshmallow 說...

CM兄,Samsara-多謝晒,非常期待同你地見面!

安兄 – 咁講啦,老細請你番黎,做好自己既野肯定係最基本既requirement,做好自己既野會避免俾人炒,但係唔會令老細欣賞你.小女子一向相信做野要俾多過自己應該做既. 所以小女子除咗要一直update自己既business knowledge (呢樣根本就係小女子既基本,連呢樣都唔做得好,咁小女子就一定走得).但係除咗business knowledge,我都會掂下管理呀,睇下code呀,同啲程式員吹下水呀,講下technical architecture咁…

我諗對程式員黎講,道理一樣,要做到付出多過自己應該做既.有啲程式員好以你咁講,唔一定要有好既business knowledge,但係佢地一定有付出多過自己應該做既,例如佢地可以當一個subject area expert,對technical既決定好有貢獻,又或者可以好似我識得好多既程式員咁,對business好有認識,同人地好吹得…總之佢地一定有啲野,令到老細決定升人時候諗起佢.

安諾勿斯 說...
此留言已被作者移除。
安諾勿斯 說...

網聚?棉花姐又話同小弟去飲咖啡?

棉花姐樓上講o既講法,好啱聽!

Marshmallow 說...

係呀,我地星期五英雄會,你有冇興趣?

揚眉女子 說...

呢個世界, 憎人富貴厭人窮既人多的是, 洗乜理佢咁多. 最緊要, 人工出o係你戶口.

安諾勿斯 說...

有呀!

唔知請棉花姐o既依貓添。棉花姐唔該你依貓小弟o既熱線-anony721@gmail.com。

大口仔 說...

恭喜哂!不招人妒是庸才,你證明左你唔係庸才。:)

你屬咩?大口仔今年又係命犯小人!慘!